07‏/05‏/2011

الاجتماع السري الذي اعترف فيه الأوباش بثورة 17 فبراير - ســـري يمنع التداول

القذافي : سمعت يا خروبي بخبر اغتيال بن لادن
الخروجي : لا يا قائد مجابوشي في قناة الجماهيرية
الخويلدي : امتى يا قائد قتلوه .
القذافي : حتى انى عابي عليكم اتبعوا فى الاخبار .
الخويلدي و الخروبي مع بعض : ماهو قتلنا معاش اتبعوا القناوت المغرر بها .

القذافي : قتلكم معاش اتبعوها لما ايجبو خبر على الثوار بس .
الخروبي : المرتزقة قصدك يا قائد .
الخويلدي : قصدك الجردان يا قائد راهو قلت ثوار انت .
القذافي : و اللهي معاد نعرف شنو انقول الحق .
الخويلدي : مش مشكلة يا قائد توا بعد ما قتلت سيف العرب زاد الدعم الشعبي
القذافي : بجديات زاد يا خويلدي و الله حالتي يعلم بيها ربي
الخروبي : اطمن يا قائد الناس تتفرج على قناة الجماهيرية و كلهم معاك .
القذافي : ياريتنا ما حرقنا السفارة الايطالية و البريطانية , هذي فكرة سيف الله لا تربحه .
الخروبي : مش مشكلة توا انقولو الشعب غاضب و انهدو الموضوع
القذافي : تي كيف بتهدي يا حمار و هما لزو السفير في لندن .
الحويلدي غير دقيقة يا قائد .. توا انطلعوا اثنين ولا ثلاثة من لبعتناهم يعترفوا على التلفزيون بأنهم دروها من الغضب .
الخويلدي : واللهي فكرة باهي شوف خالد و حسن
الخروبي : من خالد و حسن ؟
الخويلدي : لبعتناهم من الامن الخارجي و قلنالهم يمشو يحرقوا .
الخروبي : كيف يا خويلدي تبعتهم بعتالي اتقوللهم ايقولو دراوها بروحهم .
القذافي : تي داروها بروحهم الكلاب و اضربوهم حتى الضرب قدام الشاشة انى ميهمني حد قتلت ولدي ما نقتلش للاوباش خلوهم يعترفوا بالكذب .
الخويلدي : حاضر يا قائد متعفلقش روحك توا انكلموا شاكير ايقول مغرر بهم و هذي مجموعة واخدة حبوب هلوسة .
القذافي : كلمه الكلب هوا ينبح ينبح اتصلو بشاكير الكلاب توا توا .
رن رن رن
شاكير : الو منو
القذافي : معمر يا حمار تعال بسرعة
شاكير : صباح الخير سيدي , وين بنجي معرفناش في اما نفق قاعد .
معمر : قاعد في نفق باب العزيزية تعال توا ,, و تعال من غير دوش اصلاً انت متغسلش 5 دقائق نبيك اهنى .
شاكير : حاضر سيدي
الخروبي : باهي بن لادن مات كيف نستفيدو من الخبر .
القذافي : ياخروبي كان بتقول القاعدة موجودة في ليبيا معناها بيجونا شن رايك يا خويلدي
الخويلدي : انى انقول معاش اتقول على الثوار انهم تنظيم القاعدة خلينا على حبوب الهلوسة و المرتزقة .
الخروبي : لالا قولو القاعدة مرات امريكيا اتساعدنا و توقف القصف .
القذافي : يا حمار بتقتلني تى هما ايدورو فيا فى السماء بتجيبهملي برجلليهم .
الخروبي : اسف يا قائد معاش عرفت حاصلين احنى .
الخويلدي : انكلمو البغدادي بالك ايساعدنا .
القذافي : البغذادي اكيد سكران امس فى المزرعة لكن كلمة هي .
رن رن رن
البغدادي : ايوه يا خويلدي انشاء الله خير .
الخويلدي : قول صباح الخير ياكلب و انت اسلوبك زي الحكومة لتخدم معاك .
البغدادي : اسف سيدي استغربت المكالمة على الصبح .
الخروبي : دقيقة يبيك القائد .
البغدادي : يــــــــــــــساتر
القذافي : تحرك ياكلب دير حاجة وانت محشمني مع العالم .
البغدادي : قولي شن نقدر اندير يا قائد و عمري و روحي ليك
القذافي : تمشي للجبهة اتقاتل .
البغدادي : يا قائد انى مداير موعد مع رئيس روسيا قال بنوقف مع ليبيا ... و انت قولي نمشي للجبهة ولا نمشي للرئيس ؟
القذافي : لا لا فوتها الجبهة برا لروسيا و قوللهم راهو حاصلين لين خلاص و كلم بوتن قوله النفط خوده غير ساعدنا توا .
البغذادي " حندير جهدي يا قائد كون هانى .. الله و معمر و ليبيا وبس .
القذافي : باهي موضوع تاني ... بنقولو تنظيم القاعدة في ليبيا بعد ما مات بن لادن شنو رايك .
البغدادي : و اللهي ايجوك طول يلقوها فرصة .
القذافي : باهي شنو الحل .
البغذادي : تى اعترف بأنهم ثوار و شرفاء و يبوا الحرية و خلاص .. خيرلك من ايجوك الامريكان .
القذافي يكلم في الخروبي و الخويلدي : قالي البغذادي قول بأنهم ثوار و يبوا الحرية .
الخروبي و الخويلدي : فكرة كويسة يا قائد
القذافي : قصدكم نعترفوا بيهم خير من القصف على احياشي كل يوم ؟
البغدادي :: الو الو الو
الخروبي : اسمع كلم خالد كعيم ايقول هذم ثوار و حنى واخدين حبوب هلوسة ومغرر بنا .

القذافي و اللهي قولتك : اكتبوا سيتحدث الاخ القائد بعد قليل على قناة الجماهيرية .

وسيتم الأعتراف بهذه الثورة اليوم او غداً

عاشت السابع عشر من فبراير و المجد للشهداء

ليست هناك تعليقات:

إرسال تعليق

Related Posts Plugin for WordPress, Blogger...
حدث خطأ في هذه الأداة